कत्तेक ढोही अतितक बखान,
वर्तमान, भुगोलक ठेकाने नञि
जनक, विद्यापतिक जय जय केलौं
मुदा ललित बाबूक गुणगाने नञि
बोइनक फेर में जत तत छिछियाई
मिथिला में कोनो कारखाने नञि
एम्हर ओम्हर दोसरक बोली
घ'रो मे मैथिलिक सम्माने नञि
अनूप ओझरायल पान मखान मे
विकासक कोनो बखाने नञि
बरखी सराध मे व्यस्त अत्तेक
दहेज़ मुक्त मिथिला पर ध्याने नञि
जनगणना मे हिन्दी मातृभाषा
मैथिलिक कत्तौ कोनो नामे नञि!
मुम्बई दिल्ली मे कि मिथिला राज बनत?
मिथिलाक धरती पर कोनो प्लाने नञि
कहितौं हमहुँ जय मैथिल
मुदा कहबाक कोनो बहाने नञि!
लेखक : अनूप सत्यनारायण झा
No comments:
Post a Comment