अबला नारि --- कल्पना झा

 

पुरातनि सँ सदति नारि , अपन कर्तव्य करैत छथि

आख्यानों में ई ब्याख्या  , मनीषि  सभ  केने छथि 

अगर भूलो सँ जौं नारि , नहि करती कर्म ओ अप्पन 

त  ई  श्रृष्टि कोना बाँचत , एतेक  त सभ  जानए छी

अहिल्या जे शिला बनली , तकर अनुमान अछि किनको

छललि गेली ओ पुरुषे सँ , भेलनि  उद्धार  पुरुषे  सँ

मुदा नारिक ई पीड़ा , नहि बुझलक आई तक कीयो

रचल किनकर ई विधना छी , बुझाओत ई बुझौअल के

स्वयंवर जीति के अनला , कहाबैत छला धनुर्धर जे

पति पाँचो धुरंधर छलनि , सगर संसार जानैत छी

छलल अपने सँ  ओ गेली , जे अबला नारि बनि गेली

जे अग्नि पुत्री छली ज्वाला , लगाओल दाव पर गेली

बाँचत सम्मान कोना के , कठिन ई प्रश्न अछि सोचू

मिझाओल दीप जौं राखब , भेटत उजियार कोना के

हवस के भेंट जौं चढ़ती , सदति श्रृष्टि के निर्मात्री

तखन श्रृष्टि कोना बाँचत , एतेक त सभ जानैत छी

लेखक -:

 कल्पना झा 

१६.  ११. २०१७