बिना

डेग झारि नहि चलब बाट मे ठेसो लगनेँ |

पैर वारि नहि धरब मार्ग मे काँटो गरनेँ |

आबो नहि सम्हरब दुश्मन के वैभव हरणेँ |

आनक उन्नति देखि कोनो फल नहि हो जरनेँ |

युक्ति बिना नहि कार्य सिद्ध कतबो श्रम कएनेँ |

प्राप्त सफलता नहि हो , लगन धैर्य बिनु धएनेँ |

पेट भरय नहि रस लागल आँगुर केँ चटनेँ |

भेटय शान्ति संतोष बाँटि केँ हिस्सा खेनेँ |

मोजर भेटय ने गौरव गीत अपन मुँह गेनेँ |

सुनियों केँ अन्ठाबय, हरदम गाल बजेनेँ |

बिनु साहस के युद्ध विजय नहि खड्ग पिजेनेँ |

चौर बनय नहि भात पैन बिनु आगि सिझेनेँ |

सहन शक्ति नहि बिना क्रोध के आगि मिझेनेँ |

प्रेम होए नहि बात बिचार सँ बिना रिझेनेँ |

नहि श्रद्धा विश्वास बिना आत्मा सुनझेनेँ ||

************************मधुकर *************

01/09/2017